બોલિવૂડની સૌથી લોકપ્રિય કોમેડી ફ્રેન્ચાઈઝી ‘હેરા ફેરી 3’ (Hera Pheri 3) ની આતુરતાથી રાહ જોઈ રહેલા ફેન્સ માટે એક નિરાશાજનક સમાચાર આવ્યા છે. ફિલ્મના ઓરિજિનલ ડાયરેક્ટર પ્રિયદર્શને હવે આ પ્રોજેક્ટમાંથી પોતાનો હાથ પાછો ખેંચી લીધો છે.
ડાયરેક્ટર પ્રિયદર્શને પોતે જ કરી પુષ્ટિ
તાજેતરમાં પ્રોડ્યુસર ફિરોઝ નાડિયાડવાલાએ જણાવ્યું હતું કે પ્રિયદર્શન આ ફિલ્મનો હિસ્સો નથી. આ અંગે વાત કરતા પ્રિયદર્શને કહ્યું, “ફિરોઝે જે કહ્યું છે તે સાચું છે. હું અત્યારે ‘હેરા ફેરી 3’ સાથે જોડાયેલો નથી.” તેમણે વધુમાં ઉમેર્યું કે, ઘણા કાનૂની મુદ્દાઓ અને આંતરિક વિવાદોને કારણે આ ફિલ્મ ક્યારેય રિલીઝ થઈ શકશે નહીં તેવું દેખાઈ રહ્યું છે.
મ્યુઝિક રાઇટ્સ અને કાનૂની મુશ્કેલીઓ
પ્રિયદર્શનના જણાવ્યા અનુસાર, ફિલ્મ અને તેના મ્યુઝિક રાઇટ્સને લઈને ભારે કાનૂની ગૂંચવણો ચાલી રહી છે:
-
ભૂષણ કુમારે સાર્વજનિક રીતે ‘હેરા ફેરી 3’ ના મ્યુઝિક રાઇટ્સ પર પોતાનો દાવો કર્યો છે.
-
પ્રોડક્શન હાઉસ ‘સેવન આર્ટ્સ ઇન્ટરનેશનલ’ નો આરોપ છે કે ફિરોઝ નાડિયાડવાલા પાસે માત્ર મલયાલમ ફિલ્મ ‘રામજી રાવ સ્પીકિંગ’ ની હિન્દી રિમેક બનાવવાનો જ અધિકાર હતો.
-
કરારના ઉલ્લંઘન અને રાઇટ્સ અક્ષય કુમારની કંપનીને ટ્રાન્સફર કરવાને લઈને પણ વિવાદ ચાલી રહ્યો છે.
આ વર્ષે શૂટિંગ થવાની કોઈ શક્યતા નથી
આ વિવાદોને કારણે ફિલ્મના શૂટિંગમાં સતત વિલંબ થઈ રહ્યો છે. જ્યારે પ્રિયદર્શનને પૂછવામાં આવ્યું કે શું આ વર્ષે ફિલ્મનું પ્રોડક્શન શરૂ થશે, ત્યારે તેમણે સ્પષ્ટ ના પાડી દીધી હતી. અગાઉ પરેશ રાવલે ફિલ્મ છોડવા અંગે પણ હોબાળો થયો હતો અને અક્ષય કુમારે 25 કરોડનો દાવો કર્યો હતો, જોકે બાદમાં તે મામલો થાળે પડ્યો હતો. પરંતુ હવે નવા વિવાદોને કારણે ફિલ્મ પર સંકટના વાદળો મંડરાઈ રહ્યા છે.
