નવી દિલ્હી: જો તમે સોનું કે ચાંદી ખરીદવાનું વિચારી રહ્યા છો, તો તમારા માટે ખૂબ જ સારા સમાચાર છે. વૈશ્વિક બજારમાં નબળાઈ અને યુએસ ફેડરલ રિઝર્વના કડક વલણને કારણે શુક્રવારે ભારતીય બજારમાં સોના અને ચાંદીના ભાવમાં મોટો ઘટાડો નોંધાયો છે. મલ્ટી કોમોડિટી એક્સચેન્જ (MCX) પર સોના અને ચાંદીના ભાવ ઔંધા માથે પટકાયા છે.
આ ઘટાડા બાદ સોનું ખરીદનારાઓ અને રોકાણકારોની નજર હવે બજારના આગામી વલણ પર ટકેલી છે.
MCX પર સોના-ચાંદીના આજના ભાવ
શુક્રવારે સવારે મલ્ટી કોમોડિટી એક્સચેન્જ પર સોના અને ચાંદીમાં ભારે વેચવાલી જોવા મળી હતી:
-
સોનાનો ભાવ (Gold Rate): MCX પર સોનાનો ભાવ 2.06% ઘટીને ₹1,46,240 પ્રતિ 10 ગ્રામ પર પહોંચી ગયો હતો. બજાર ખૂલતાની સાથે જ સોનામાં ₹5,350 સુધીનો ઘટાડો જોવા મળ્યો હતો.
-
ચાંદીનો ભાવ (Silver Rate): ચાંદીની કિંમતમાં 3.73% નો મોટો ઘટાડો થયો હતો. ચાંદી પ્રતિ કિલોગ્રામ ₹8,899 સસ્તી થઈને ₹2,28,721 પર ટ્રેડ કરતી જોવા મળી હતી.
કેમ આટલા બધા ઘટી ગયા ભાવ?
સોના-ચાંદીના ભાવ ઘટવાનું સૌથી મોટું કારણ અમેરિકી ડોલરની મજબૂતી અને યુએસ ફેડરલ રિઝર્વનું નિવેદન છે. અમેરિકી સેન્ટ્રલ બેંકે વ્યાજ દરો સ્થિર રાખ્યા છે, પરંતુ આગામી સમયમાં વ્યાજ દરો વધારવાના સંકેત આપ્યા છે. જ્યારે પણ વ્યાજ દરો વધે છે, ત્યારે સોનામાં રોકાણનું આકર્ષણ ઓછું થઈ જાય છે. આ કારણે રોકાણકારો સોનામાંથી પૈસા પાછા ખેંચી રહ્યા છે.
આંતરરાષ્ટ્રીય બજારમાં પણ ભારે દબાણ
વૈશ્વિક બુલિયન માર્કેટમાં પણ સતત ત્રીજા સપ્તાહે સોના અને ચાંદીના ભાવ પર દબાણ જોવા મળી રહ્યું છે. સ્પોટ ગોલ્ડ અને યુએસ ગોલ્ડ ફ્યુચર બંને નબળા સાબિત થયા છે. આંતરરાષ્ટ્રીય સ્તરે ચાંદીના ભાવ પણ ગગડ્યા છે.
ગોલ્ડમેન સેક્સે ઘટાડ્યો લક્ષ્યાંક
દુનિયાની અગ્રણી ઇન્વેસ્ટમેન્ટ બેંક ‘ગોલ્ડમેન સેક્સ’ (Goldman Sachs) એ પણ સોનાના ભવિષ્યના ભાવનો અંદાજ ઘટાડી દીધો છે. બેંકે ડિસેમ્બર સુધી સોનાનો લક્ષ્યાંક ઘટાડીને 4,900 ડોલર પ્રતિ ઔંસ કરી દીધો છે. આ સંકેતો દર્શાવે છે કે નજીકના ભવિષ્યમાં સોનાના ભાવમાં બહુ મોટી તેજી આવવાની શક્યતા હાલ પૂરતી ઓછી છે.
(નોંધ: આ લેખ માત્ર માહિતી આપવા માટે છે. રોકાણ સંબંધિત કોઈ પણ નિર્ણય લેતા પહેલા તમારા નાણાકીય સલાહકારની મદદ જરૂર લો.)
< /p>
