મશીન પાછળ માણસનું ભેજું ?: જર્મનીમાં સગીરાની છેડતીના આરોપમાં પોલીસે રોબોટ જપ્ત કર્યો

વિશ્વભરમાં રોબોટિક્સ અને આર્ટિફિશિયલ ઇન્ટેલિજન્સનો પ્રભાવ વધી રહ્યો છે ત્યારે જર્મનીમાંથી ટેકનોલોજીના દુરુપયોગનો એક અત્યંત વિચિત્ર અને ચોંકાવનારો કિસ્સો સામે આવ્યો છે. જર્મનીના કોલોન (Cologne) શહેરમાં ૧૬ વર્ષની સગીરા સાથે કથિત રીતે અશ્લીલ હરકતો અને છેડતી કરવાના આરોપસર પોલીસે એક રોબોટને કાયદેસર રીતે જપ્ત કરી લીધો છે.

આ અજીબોગરીબ ઘટનામાં સંડોવાયેલા બે યુવકો સામે પોલીસે તપાસ શરૂ કરી છે અને તેમના સ્માર્ટફોન પણ કબ્જે લીધા છે. પોલીસ એ દિશામાં તપાસ કરી રહી છે કે આ રોબોટ પોતાની રીતે ચાલતો હતો કે તેનું સંચાલન રિમોટ કંટ્રોલ દ્વારા કરવામાં આવી રહ્યું હતું.

શું છે સમગ્ર ઘટના? કારની ડેકીમાંથી મળ્યો રોબોટ

પોલીસ દ્વારા આપવામાં આવેલી વિગતો મુજબ:

• અશ્લીલ ચેનચાળા: શનિવાર અને રવિવારની રાત્રિ દરમિયાન કોલોન શહેરમાં એક રોબોટે ૧૬ વર્ષની સગીરાને અયોગ્ય રીતે સ્પર્શ કર્યો અને તેની સામે અશ્લીલ ઈશારાઓ કર્યા હોવાની ફરિયાદ મળી હતી.

• રોબોટ અને ફોન જપ્ત: ઘટનાની જાણ થતાં જ પોલીસ ટીમ તાત્કાલિક સ્થળ પર પહોંચી હતી. નજીકના એક ફાસ્ટ ફૂડ રેસ્ટોરન્ટ બહાર પાર્ક કરેલી કારની ડેકીમાંથી પોલીસે આ રોબોટને શોધી કાઢી જપ્ત કર્યો હતો. સાથે જ ત્યાં હાજર ૧૬ અને ૧૯ વર્ષના બે યુવકોના મોબાઈલ ફોન પણ જમા લીધા હતા.

• વીડિયો વાયરલ કરવાનો આરોપ: આ બંને યુવકો પર આરોપ છે કે તેમણે રોબોટની આ હરકતોનો વીડિયો પોતાના મોબાઈલમાં શૂટ કર્યો હતો અને તેને સોશિયલ મીડિયા પર વાયરલ કર્યો હતો.

કેવો દેખાય છે આ રોબોટ? ૪ ફૂટની ઊંચાઈ અને વિચિત્ર વેશભૂષા

નોર્થ રાઇન-વેસ્ટફેલિયા પોલીસની કોલોન યુનિટે આ રોબોટની તસવીર ફેસબુક પર શેર કરી છે:

• રોબોટની ઊંચાઈ આશરે ૧૨૦ સેન્ટિમીટર (લગભગ ૪ ફૂટ) છે અને તેનો રંગ લાલ અને ગોલ્ડન છે.

• રોબોટને સફેદ બનિયાન, કાળો પેન્ટ, ગળામાં સોના જેવી ચેન, આંખો પર સનગ્લાસ (ચશ્મા) અને ચહેરા પર નકલી મૂંછો લગાવીને એક વિચિત્ર લુક આપવામાં આવ્યો હતો.

પહેલેથી પ્રોગ્રામ્ડ હતો કે રિમોટથી કંટ્રોલ? પોલીસ મૂંઝવણમાં

ઈન્ટરનેટ પર વાયરલ થયેલા વીડિયોમાં આ બંને યુવકો રોબોટને રસ્તા પર મહિલાઓના એક જૂથ તરફ લઈ જતાં જોવા મળે છે. રોબોટ એક મહિલા સાથે અથડાય છે અને કેટલીક મહિલાઓને ગળે લગાવવાનો પ્રયાસ કરે છે. અન્ય એક દ્રશ્યમાં રોબોટ અશ્લીલ ઈશારા કરે ત્યારે એક યુવક તેને પાછળ ખેંચતો અને તેના પર બૂમો પાડતો નાટક કરતો દેખાય છે.

કોલોન પોલીસના પ્રવક્તા ક્રિસ્ટોફર બર્મેલે જણાવ્યું હતું કે:

• પોલીસ પ્રશાસન માટે આ તદ્દન નવો અને અભૂતપૂર્વ કેસ છે.

• હાલ બંને યુવકોને શંકાસ્પદ માનવામાં આવ્યા છે. પોલીસ ટેકનિકલ એક્સપર્ટ્સની મદદથી તપાસ કરી રહી છે કે રોબોટની તમામ ક્રિયાઓ અગાઉથી સોફ્ટવેરમાં ફીડ (પ્રોગ્રામ્ડ) કરવામાં આવી હતી કે પછી કોઈ વ્યક્તિ તેને છૂપી રીતે રિમોટ કે એપ દ્વારા રીઅલ-ટાઇમમાં ઓપરેટ કરી રહી હતી.

પોલીસે સોશિયલ મીડિયા પર સ્પષ્ટ ચેતવણી આપી છે કે આવી સંવેદનશીલ ઘટનાઓ પર મજાક ઉડાવવી કે તેના વીડિયો શેર કરવા એ પીડિત કિશોરી માટે માનસિક ત્રાસ સમાન છે, તેથી લોકોએ આવા વીડિયો ફેલાવવાથી દૂર રહેવું જોઈએ.