breakup : પ્રેમ સંબંધો દરમિયાન પાર્ટનર પર લાખો-કરોડો રૂપિયાના લક્ઝરી ગિફ્ટ્સ આપવા સામાન્ય બાબત છે, પરંતુ બ્રેકઅપ બાદ આ જ ખર્ચ જ્યારે કાનૂની વિવાદમાં ફેરવાય ત્યારે સ્થિતિ અત્યંત રસપ્રદ બની જતી હોય છે. સિંગાપોર હાઇકોર્ટમાં આવો જ એક ચોંકાવનારો કિસ્સો સામે આવ્યો છે, જ્યાં ચંદર અગ્રવાલ નામના વ્યક્તિએ પોતાની પૂર્વ ગર્લફ્રેન્ડ ફેલિશિયા લી સામે સંબંધ દરમિયાન કરેલા અંદાજે ₹3.5 કરોડ (4,68,090 સિંગાપોર ડોલર) પાછા મેળવવા દાવો માંડ્યો હતો.
જોકે, અદાલતે ચંદરના આ દાવાને સંપૂર્ણપણે ફગાવી દઈને સ્પષ્ટ કર્યું છે કે સંબંધ દરમિયાન પોતાની મરજીથી અપાયેલી મોંઘી ભેટોને બ્રેકઅપ પછી ‘લોન’ ગણાવી શકાય નહીં.
લક્ઝરી ટ્રિપ્સ, લુઈ વિટન બેગ્સ અને ફર્સ્ટ ક્લાસ મુસાફરી
ડેટિંગ દરમિયાન ચંદરે પોતાની ગર્લફ્રેન્ડ પર પાણીની જેમ પૈસા વહાવ્યા હતા:
-
મોંઘીદાટ ભેટો: લુઈ વિટન (Louis Vuitton) ના હેન્ડબેગ્સ, પ્રાડા (Prada) ના વાઉચર્સ અને મોંઘી એપલ-હર્મિસ (Hermès) સ્માર્ટવોચ જેવી અત્યંત કિંમતી વસ્તુઓ ગિફ્ટ કરી હતી.
-
યુરોપ ટૂર: બંનેએ સાથે મળીને બાર્સિલોના, લિસ્બન અને લંડન જેવા શહેરોનો લક્ઝરી પ્રવાસ કર્યો હતો.
-
અતિભવ્ય ખર્ચ: ફર્સ્ટ ક્લાસ કે સ્યુટ્સ ક્લાસ ફ્લાઇટ ટિકિટ્સ, 7-સ્ટાર હોટેલ્સમાં રોકાણ અને મોંઘી બ્રાન્ડેડ શોપિંગનો તમામ ખર્ચ ચંદરે પોતે ઉઠાવ્યો હતો.
બ્રેકઅપ થતાં જ પ્રેમ ‘વ્યાજ વગરની લોન’ બની ગયો!
ડિસેમ્બર 2023માં બંને વચ્ચે અણબનાવ સર્જાતાં બ્રેકઅપ (breakup) થઈ ગયું. ચંદરને શંકા હતી કે લી તેને છેતરી રહી છે. સંબંધ તૂટતાં જ માર્ચ 2024માં ચંદરે સિંગાપોરની કોર્ટમાં કેસ દાખલ કર્યો:
-
ચંદરનો દાવો: આ તમામ પૈસા કોઈ સામાન્ય ગિફ્ટ નહોતા, પરંતુ સંબંધ ચાલુ રાખવા માટે આપવામાં આવેલી ‘ઇન્ટરેસ્ટ-ફ્રી લોન’ (વ્યાજ વગરની લોન) હતી, જે લીએ પરત કરવાની હતી.
-
ફેલિશિયા લીનો પક્ષ: લીએ કોર્ટમાં સ્પષ્ટતા કરી કે આ તમામ ખર્ચા ચંદરે પોતાની ખુશી અને પ્રેમથી કર્યા હતા. સંબંધ દરમિયાન આ પૈસા ક્યારેય પાછા આપવા પડશે તેવી કોઈ શરત કે સમજૂતી થઈ જ નહોતી.
કોર્ટનો મોટો ચુકાદો: ₹3.5 કરોડ તો ન મળ્યા, ઊલટાનો ખર્ચ માથે પડ્યો
સિંગાપોર હાઈકોર્ટના જજ લી સિયૂ કિને તમામ દલીલો સાંભળ્યા બાદ ચંદરની અરજી ફગાવી દીધી:
-
ગિફ્ટ એટલે ગિફ્ટ: કોર્ટે નોંધ્યું કે આ તમામ રકમ સ્વેચ્છાએ ભેટ તરીકે અપાઈ હતી, લોન તરીકે નહીં. કોઈ વ્યક્તિનો ખર્ચ કરવાની ઓફર સ્વીકારી લેવાથી તે આપોઆપ ‘ઉધાર’ કે લોન બની જતો નથી.
-
પુરાવાનો અભાવ: રકમ પાછી ચૂકવવા અંગે બંને પક્ષો વચ્ચે કોઈ લેખિત કે મૌખિક કરાર થયો હોય તેવો કોઈ નક્કર પુરાવો કોર્ટ સમક્ષ રજૂ થયો નહોતો.
-
કાનૂની ખર્ચ ચૂકવવાનો આદેશ: હાઇકોર્ટે માત્ર ₹3.5 કરોડની વસૂલાતની માંગણી જ ન ફગાવી, પરંતુ ફેલિશિયા લીને થયેલો તમામ કાનૂની અને વકીલાતનો ખર્ચ પણ ચંદર અગ્રવાલને જ ચૂકવવાનો આદેશ આપ્યો હતો.
