Bhopal Crime: મધ્ય પ્રદેશની રાજધાની ભોપાલમાંથી સોશિયલ મીડિયા પર ઓળખ છુપાવીને છેતરપિંડી કરવાનો એક ચોંકાવનારો નો કિસ્સો સામે આવ્યો છે. અહીં ઇન્સ્ટાગ્રામ પર પોતાને ‘ક્રિશ જૈન’ બતાવનાર યુવક વાસ્તવમાં લખનૌનો રહેવાસી ‘જુમ્મન અંસારી’ નીકળ્યો હતો.
આરોપી યુવતીને નશીલો લાડુ ખવડાવીને દિલ્હી લઈ ગયો હતો. દિલ્હી પહોંચીને તેણે મસ્જિદમાં નિકાહ કરવાનું દબાણ કર્યું ત્યારે તેની સાચી ઓળખ છતી થઈ હતી.
ટ્રુકોલર પર આવતું હતું રોકી શર્મા નામ
ભોપાલની નિશાતપુરા પોલીસના જણાવ્યા અનુસાર, પીડિત યુવતીની ઓળખ ઇન્સ્ટાગ્રામ પર આરોપી સાથે થઈ હતી. આરોપીએ પોતાનું હિન્દુ નામ ક્રિશ જૈન બતાવ્યું હતું.
જ્યારે ટ્રુકોલર (Truecaller) પર તેનું નામ રોકી શર્મા આવતું હતું. આ જ ખોટી ઓળખ બતાવીને તેણે યુવતીને પોતાની જાળમાં ફસાવી હતી.
નશીલો લાડુ ખવડાવી દિલ્હી લઈ ગયો
૨૩ જુલાઈના રોજ આરોપીએ યુવતીને કરૌંદ ચોક ખાતે બોલાવી હતી. ત્યાંથી બહાનું બનાવીને તે યુવતીને ભોપાલ રેલ્વે સ્ટેશન લઈ ગયો.
સ્ટેશન પર તેણે પ્રસાદના નામે યુવતીને નશીલો લાડુ ખવડાવી દીધો અને ટ્રેનમાં બેસાડીને દિલ્હી લઈ ગયો હતો.
મસ્જિદ પહોંચતા જ થયો હોબાળો
દિલ્હી પહોંચતા જ આરોપીએ યુવતીને કહ્યું કે મસ્જિદ જઈને લગ્ન કરવાના છે. યુવતીએ ધર્મ પરિવર્તન કરવાનો સ્પષ્ટ ઇનકાર કરી દીધો.
ત્યારે તેને ખબર પડી કે યુવકનું સાચું નામ જુમ્મન અંસારી છે. આ પછી સ્ટેશન પર જ બંને વચ્ચે ભારે બોલાચાલી અને હોબાળો શરૂ થઈ ગયો હતો.
પોલીસે દિલ્હીથી કરી ધરપકડ
યુવતી ગાયબ થતાં જ પરિવારજનોએ ભોપાલના નિશાતપુરા પોલીસ સ્ટેશનમાં ફરિયાદ નોંધાવી હતી. જીઆરપી (GRP) એલર્ટના આધારે દિલ્હી પોલીસે સ્ટેશન પર હોબાળો કરી રહેલા બંનેને કસ્ટડીમાં લીધા હતા.
ભોપાલ પોલીસની ટીમે દિલ્હી પહોંચીને યુવતીને સુરક્ષિત પરત લાવી હતી અને આરોપી જુમ્મન અંસારી સામે ગુનો નોંધીને તેને જેલ ભેગો કર્યો છે.
