ફીફા વર્લ્ડ કપ ૨૦૨૬ (FIFA World Cup 2026) માં અત્યાર સુધીનો સૌથી મોટો ઉલટફેર જોવા મળ્યો છે. ફીફા રેન્કિંગમાં ૩૪મા સ્થાને રહેલા પેરાગ્વેએ ચાર વખતની વર્લ્ડ ચેમ્પિયન જર્મનીને હરાવી દીધી છે. આ રોમાંચક મેચમાં પેરાગ્વેએ પેનાલ્ટી શૂટઆઉટમાં જર્મનીને ૪-૩થી હરાવી વર્લ્ડ કપમાંથી બહાર કરી દીધું છે.
નક્કી કરેલી ૯૦ મિનિટ અને એક્સ્ટ્રા ટાઈમ સુધી બંને ટીમો ૧-૧ની બરાબરી પર હતી. આ પછી મેચનો ફેંસલો પેનાલ્ટી શૂટઆઉટ દ્વારા કરવામાં આવ્યો હતો.
૯૦ મિનિટ સુધી કાંટાની ટક્કર
મેચના પહેલા હાફમાં પેરાગ્વેએ સરસાઈ મેળવી હતી. ૪૨મી મિનિટે જુલિયો એન્સિસોએ શાનદાર હેડર લગાવીને ગોલ કર્યો હતો અને ટીમને ૧-૦થી આગળ કરી દીધી હતી.
જો કે, બીજા હાફની શરૂઆતમાં જર્મનીએ વાપસી કરી હતી. ૫૨મી મિનિટે ફ્લોરિયન વિર્ટ્ઝના પાસ પર કાઈ હેવર્ટ્ઝે શાનદાર ગોલ કરીને સ્કોર ૧-૧થી બરાબર કરી દીધો હતો. તે પછી એક્સ્ટ્રા ટાઈમમાં જર્મનીનો એક ગોલ VAR (વીડિયો આસિસ્ટન્ટ રેફરી) રિવ્યૂમાં રદ કરવામાં આવ્યો હતો.
૨૪ વર્ષ જૂની હારનો લીધો બદલો
ઐતિહાસિક જીત: પેનાલ્ટી શૂટઆઉટમાં પેરાગ્વેના ગોલકીપર ઓર્લાન્ડો ગિલે શાનદાર પ્રદર્શન કર્યું હતું. તેણે જર્મનીના બે મહત્વના શોટ રોકીને પોતાની ટીમને ૪-૩થી ઐતિહાસિક જીત અપાવી હતી.
આ જીત સાથે પેરાગ્વેએ ૨૪ વર્ષ જૂની હારનો બદલો લઈ લીધો છે. વર્ષ ૨૦૦૨ના વર્લ્ડ કપમાં જર્મનીએ પેરાગ્વેને ૧-૦થી હરાવ્યું હતું. હવે રાઉન્ડ ઓફ ૧૬માં પેરાગ્વેનો સામનો ફ્રાન્સ અને સ્વીડન વચ્ચેની મેચની વિજેતા ટીમ સામે થશે.
જર્મની માટે સતત ત્રીજો મોટો આંચકો
જર્મની માટે આ હાર ખૂબ જ આઘાતજનક છે. ૨૦૧૪માં વર્લ્ડ કપ જીત્યા બાદ આ જર્મનીની પહેલી નોકઆઉટ મેચ હતી. ગત બે વર્લ્ડ કપમાં જર્મન ટીમ ગ્રુપ સ્ટેજમાંથી જ બહાર થઈ ગઈ હતી. આ વખતે ટીમ નોકઆઉટમાં તો પહોંચી, પરંતુ રાઉન્ડ ઓફ ૩૨માં જ તેની સફર પૂરી થઈ ગઈ છે. પહેલા હાફમાં ૭૮ ટકા બોલ પોઝેશન હોવા છતાં જર્મની પેરાગ્વેના મજબૂત ડિફેન્સને તોડી શક્યું નહીં.
